Այսօր 15 յունիս 2017-ին, սրտի յետվիրահատական բարդութիւններու պատճառով իր մահկանացուն կնքած է Լիբանանի Այնճար աւանէն 1946-ի ներգաղթեալ ընտանիքի շարաւիղ, 65-ամեայ Մանուէլ Մանուկեանը:
Հանգուցեալի հոգեհանգստեան արարողութիւնը տեղի պիտի ունենայ 16 յունիսին, Էջմիածինի Սուրբ Շողակաթ եկեղեցւոյ մէջ, ժամը 19:00-ին, իսկ յուղարկաւորութիւնը 17 յունիսին, ժամը 13:00-ին, հայրենի Ոսկեհատ գիւղի գերեզմանատան մէջ:
Նշենք, որ Մանուէլ Մանուկեան ծնած է Ռուսաստանի Պառնաուլի շրջանի Պայէվօ գիւղը (1951): Անոր աքսորուած ծնողները Ծերուն եւ Աննա Մանուկեաններ 1955-ին Սիպիրէն վերադարձած են Հայաստան եւ հաստատուած ներկայիս Արմաւիրի մարզի Ոսկեհատ գիւղին մէջ:
Ուսանած է Ոսկեհատի միջնակարգ դպրոցը (1958-1968 ), որմէ ետք ուսումը շրունակած է Երեւանի «Խաչատուր Աբովեան»ի մանկավարժական հիմնարկի, պատմութեան բաժինը (1969-1973): Ուսումը աւարտելէն ետք ծառայած է Խորհրդային Բանակին մէջ: Մինչեւ հանգիստի կոչուիլը, երկար տարիներ եղած է մանկավարժ՝ աշխատելով տարբեր շրջաններու մէջ: 1992-2012–ին եղած է Ոսկեհատի միջնկարգ դպրոցի տնօրէն: Զբաղուած է հասարակական եւ ազգային գործունէութեամբ:
Ունի երկու դուստր, մէկ զաւակ, երեք թոռներ: Եղած է կենսուրախ ու հիւմորով լեցուն անձ, կեանքի վերջին շրջանին զբաղուած էր գիւղատնտեսութեամբ:
Նշենք, որ հանգուցեալը հայրն է Հայաստանեայց Առաքելական եկեղեցւոյ Մեծն Բրիտանիոյ թեմի առաջնորդ Տ. Յովակիմ եպս. Մանուկեանին:
| 
![["Armenian Diocese of the UK"]](http://r.newsletter.armeniandiocese.org.uk/7w2ulbgytve.jpg)
No comments:
Post a Comment